Kalaallit inuiaqatigiivini inuusuttuaqqat.

Una nalunaarusiaq tassaavoq SFI-ip nalunaarusiariumaagaasa sisamaasussat aappassaat, NAKUUSA-mik ingerlatamik malinnaalluni suliat. Ingerlatap siunertaraa kalaallit meerartaasa inuuniarnermikkut aammalu pisinnaatitaaffitsigut nukittorsarnissaat. Ukiuni makkunani Kalaallit Nunaanni inunnik naliginnaasunik (aammalu inuusuttuaqqanik) inuuniarnermi imminnut allallu inuunerinnissaannut akisussaassuseqarnerulernissamik siunertaqartumik suliniarnerit ilagaat.
Inuusuttuaqqat 373-it 13-iniik 15-inut ukiullit Kalaallit Nunaanni komuunini sisamaneersut illoqarfinniik aammalu nunaqarfinniik inuuniarnermi ajornartorsiutit pillugit isumaannik aammalu ilisimasaannik apersorneqarput. Apersorneqartut inuusuttuaraapput naliginnaasut, amerlanerpaartaalu angajoqqaatik angajoqqaartilluunniit ataaseq najugaqatigivaat.
Misissuinerup takutippaa, inuusuttuaqqat ikitsuinnaat isumaqartut, inuuniarnermi ajornartorsiutit ilisimasaqarfigilluarlugit. Taamaakkaluartorli inuusuttuaqqat ersarissumik isumaqarput, inuusuttuaqqat angajoqqaallu aalakoortarnerat, ikiaroortarnerat, kinguaassiutinik atornerluisarneq aammalu pinerluttarnerit inuuniarnermi ajornartorsiutaasut.
Inuusuttuaqqallu amerlanersaasa kissaatigaat inuuniarnermi ajornartorsiutit pillugit iliuuseqartoqartariaqartoq: inuusuttuaqqat 80 %-ii isumaqarput inuusuttuaqqat angajoqqaallu aalakoornartumik ikiaroornartumillu atuisarnerujussuat millisinniartariaqartoq. Niviarsissat sisamaagaangata pingasut aammalu nukappissat affaat isumaqarputtaaq, kinguaassiutitigut kanngutsaatsuliortarnerpassuit iliuuseqarfigineqartariaqartut. Taamatuttaarlu ippoq makkununnga isumaat: erngunnermut, pinerlunnermut, atuarfimmik malinnaannginnermut, ilinniagaqannginnermut, suliffeqannginnermut aammalu inuusuttuaqqat tarnikkut ajornartorsiutaat pillugit.