Kalaallit nunaanni meeqqanut inuusuttunullu isumaginninnikkut suliniutit.

Matuminnga nalunaarusiornikkut siunertaavoq Kalaallit Nunaanni meeqqanut inuusuttunullu isumaginninnikkut suliniutit 2011-mi ingerlanneqartut pillugit tamakkiisumik takussutissiinissaq.
Misissuinermik aningaasalersuisuuvoq Villum Fonden paasissutissallu saqqummiunneqartut Namminersorlutik Oqartussat nunamilu kommunit sisamaasut 2011-mut aningaasartuutissanut isertitassanullu siumoortumik missingersuusiaannik tunngaveqarput. Taakku saniatigut paasissutissat suliffinnit imminut pigisunit, suliffinnit nammineq ingerlatsisunit, suliniaqatigiiffinnillu naalakkersuisutiguunngitsunit, kiisalu kattuffinnit peqatigiiffinnillu namminersortunit katersorneqarsimapput.
Paasissutissat suliniutinit assigiinnngitsunit katillugit 141-nit pissarsiarineqarput.
Suliniutit amerlanersaat ukioq kaajallallugu ingerlasarput imaluunniit ukiut tamaasa ukiup qanoq ilinerani aalajangersimasumi ingerlasarlutik, nukiillu ilarujussui ulluunerani paaqqinnittarfinnik meeqqallu angerlarsimaffinnik pilersitsinermut ingerlatsinermullu atorneqarput. Suliniutit Namminersorlutik Oqartussanit kommuninillu aningaasalersorneqartut tassaagajupput pilersaarutaareersut aammalu isumaginninnikkut aaqqissuussaanermut ilaareersut, suliniutilli nutaat ileqquusunik malinninnginnerusut amerlanertigut suliffeqarfinnit imminut pigisunit naminerlu ingerlatsisunit kiisalu suliniaqatigiiffinnit naalakkersuisutiguunngitsunit suliniutigineqartarlutik.
Suliniarfigineqartut pingaarnersaraat ilaqutariit meerartallit. Suliniutit inunnik isumaginninnermi sulisut ilinniarteqqinnissaannik siunertaqartut ikitsuinnaapput aammalu nunaqarfinnuinnaq sammitinneqartut ikitsuinnaallutik.