Meeqqanik inuusuttunillu 26-nik malinnaaqqinneq

Nalunaarusiaq manna kalaallit meerartaat ajornartorsiortut pillugit SFI’p nalunaarusiaasa aappassaraat, meeqqat pineqartut tassaapput, Meeqqat Inuusuttullu Illuanni Nuummiittumi ulloq unnuarlu najugaqarfissatut immikkoortortami najugaqarsimasut.
Nalunaarusiami matumani meeqqat 26-t ukiut pingasut-tallimat matuma siorna Mælkebøttemi ulloq unnuarlu najugaqarfissatut immikkoortortamiit allamut nuussimasut SFI-p malinnaavigisimavai. Siunertaavoq meeqqat taakku allamut nuunnerminni inuunerisa qanoq innerisa misissuiffigineqarnissaat, tassunga ilanngullugu meeqqat sumi najugaqarnersut, atuarnerat ilinniagaqarnerallu kiisalu meeqqat inuunerisa qanoq innerat – matumani misissorneqarluni meeqqat namminneq qanoq misiginersut, taamatuttaarli aamma misissuinerup nalaani inersimasut meeqqanik isumassuisut pissutsit qanoq isigineraat misissorneqarluni.
Ataatsimut isigalugu meeqqat taakku Kalaallit Nunaanni meeqqanut allanut naleqqiullutik ingerlanerliornerupput. Ajornartorsiut ersarinnerpaaq tassaavoq, taamaallaat ataasiakkaannguit meeqqat atuarfiannik naammassinnisimammata, ilinniakkamik aallartitsisimammata imaluunniit annikikkaluamik suliffeqarmata. Amerlanerit akipput ilinniakkamik aallartitsisimanatik, aammalu ilinniagaqalernissartik kissaatiginagu, soorlu aamma amerlanerit akisut suliffeqaratik suliffissarsioratilluunniit. Taakku saniatigut inuusuttut tallimat oqarput aalakoorniutigalugu akulikitsumik imigassartortarlutik, inuusuttullu tallimat oqaatigaat ullut tamaasa hashimik ikiaroortarlutik.
Meeqqat angajoqqaaminni najugaqarsinnaanngitsut atugarisaat pitsanngorsarniarlugit ullumikkut Kalaallit Nunaat suliniuteqarpoq misissuinerlu manna suliniarnermi iluaqutaasinnaasunik tunniussaqaqaasinnaavoq.